Wednesday, January 23, 2008

شىء غريب

حد قريب مننا أو بس عرفناه يموت ....نفضل فتره مانفكرش ف حاجه غير الموت ونحس انه قريب اوى مننا وان كل نفس داخل لنا مش هايخرج تانى...وتلاقى تصرفاتك اتغيرت وكلامك بقى فيه رنة شجن وزهدت الدنيا ف لحظه....حد بس يعزمك على فرح...وانت قاعد تتمنى لو انك مكان الفرحانين ف الفرح....مش حسد لأ ...بس تبدأ تفتكر امنياتك اللى نفسك تحققها وتتخيل فرحتك بيها لحظة ما تحققها........تبقى متغاظ من ابوك اوى لأنه مش راضى على اللى انت طلبته منه وتقعد بينك وبين نفسك تقول انه متسلط وبيحاربك نفسيا وانه مبسوط وانت مدايق...... ويجى يتكلم معاك على حياتك وحياته وانه مش عايز حد ف الدنيا دى أحسن منه غيرك وانه مش هايحرمك سعاده هايقدر يمنحهالك ف الدنيا ....تبدأ تحس انك ظلمته وانه أطيب أب ف الدنيا ونفسك تقوم تبوس إيده بس مكسوف....وإنك لو طلبت منه دلوقتى اى حاجه هايقولك عليها مليون حاضر.......حاجه غريبه....فعلا

.............

إملأ عينيك من وجوه اللأهل والأحباء والأصدقاء
ولا تؤجل إفصاحك لهم عن مشاعرك نحوهم حتى الغد
فقد لا يكونون على مسرح الحياه حين يجىء هذا الغد
"المرحوم عبد الوهاب مطاوع....محرر صفحة بريد الجمعه"

مش كل حاجه

يعنى مثلا مش كل خبر حلو يفرّح
مش كل كلمه حلوه ف مكانها
مش كل حاجه وحشه تخوف
مش كل حد قريب صديق
مش كل مره تسلم الجره
مش كل يوم انت زى ماانت
مش كل قلبك ما يدق تبقى حبيت
مش كل الناس عايشين
مش كل الكلام نسمعوه
مش كل اللى يتقال..... تصدقوه
دا مثلا يعنى...........!

ياللا بينا

تيجوا نتفق على حاجه.........تيجوا نخلى ولا حاجه تهمنا.....ولا الكبار يدايقونا .......ولا الدنيا بعندها معانا توقفنا..... مش تكبير دماغ ولا عند........احنا بس هانتعلم ازاى نعيش ويبقى لحياتنا معنى......مش ضرورى نخترع اختراع ولا نعمل عمله ماحدش عملها ....لو بس عرفنا نعيش حياتنا صح.......من غير ما نحسس حد بمشاكلنا ومن غير ما نصرخ كل ما نلاقى حاجه وقفت قصادنا ووقفتنا........ ونخلى الكبار كده يحسوا اننا كبرنا ونقدر نعتمد على نفسناونعرف ازاى حياتنا تمشى حتى بالزق...صدقونى احساس جميل انك تحس ان حياتك انت عارف اللى بيحصل فيها ايه.....مافيش جزء ضلمه ولا عارف تاخد فيه قرار.......واللا قراره مش بتاعك...تيجوا نجرب؟؟؟؟؟؟؟

وردى..................! بمبى

صحيت الصبح خير اللهم اجعله خير بصيت لقيت الدنيا قدامى لونها بمبى وردى مش عارفه بس هى كانت حاجه مسخسخه .....وقال ايه لقيت اللى ف البيت بيقولولى صباح الفل والورد والياسمين على عيونك الحلوين ولقيت الفطار جاهز واكلت بنفس حلوه كده......وجيت نازله لقيت الشوارع مرصوفه ومافيهاش فتفوتة تراب والناس صوتها واطىىىىىىىىىىى بيزقزقوا كده زى العصافير.....ولا كلكس ولا صوت وحش ولا خناقه ......ووصلت شغلى ف خمس دقايق ولقيت المدير مستنينى على الباب بيرحب بيا ومستنينى اوصل بالسلامه...... صدقونى انا ماكنتش مصدقه واتهيألى ان انا باحلم........ وجيت اشرح للولاد لقيتهم فاهمين وبيحلوا من اول محاوله واليوم عدى سهل كده و زى العسل وروحت البيت برده ف نفس الجو الانسانى بتاع الصبح ....لقيت الغدا مستنينى اتغديت وقضيت وقتى بمزاجى على النت و خلصت الروايه اللى مكنتش عارفه اخلص قرايتها بقالى حوالى شهر........ وجه وقت العشا اتعشيت ونمت بدرى وقبل مانام قلت يااااااااااااااااااارب احلم حلم حلو زى اليوم الحلو دا.
على فكره دا لا كان حلم ولا هو حصل فعلا ...بس انا باتمنى...ادى الحكايه

Thursday, January 10, 2008

قرار .....؟؟؟؟؟؟ أم فرار...؟؟؟؟؟؟ بس مش هيافه.......!!!!!!!!!!؟

يمكن لما قررت اكتب ف البلوج دى ماكانش قرار اكتر منه محاوله للهروب من العالم اللى بره دا بالمره.......ماهى اصلها بجد مش نافعه....مش عارفه اكلم البشر اللى معايا وبالنسبه لهم انا طاقه ومجنونه وبافكر ببطء وبشكل غريب وباستوعب بعد الناس كلها..من الاخر مخلوق مختلف وبالتالى حتى لما باحب او باحاول اندمج معاهم مش باعرف....قلت لو كتبت ومافيش غيرى اللى قرا مش مشكله....اهو برده ابقى اتكلمت..... ومازعلتش حد منى بم ان ماحدش هنا يعرفنى...بس الغريب ان محاولاتى للاندماج استمرت حتى ف المدونات ...بعد ماكنت باقول حد قرا او ماقراش مش مشكله ...لا بقيت اطلب من الناس تقرا مدوناتى...اللى اعرفهم واللى ماعرفهمش بقيت اعمل دعوه مفتوحه واقول اتفضلوا...تخفيضات هايله....تصفيات ...بربع التمن....يابلاش. ياللا يا جدعان قبل ما يعقل يا جدعان...اوكازيون يا جدعان.. ولا مجيب.....والغريب ان محاولاتى ف الاندماج دى مستمره- رغم الاحباط المستمر-.سواء هنا او فى المدونه بتاعة الناس اللى هم بيتكلموا كلام تقيل كده ومجعلص و عيب انى احط الكلام دا معاه.- طبعا المحاولات هى اللى مستمره مش الاحباط الحمد لله......وعلى فكره انا باكتب هناك برده وفيه ناس بتقرا وتعلق الحمد لله...بس تصدقوا لما افتح هناك واقرا احس ان واحده تانيه هى اللى كتبت التعبيرات اللى هناك دى....ونفس الحال لما ابقى فاتحه هنا واجى ابص على هناك...احس ان ايه الهبل اللى انا كاتباه دا ومين اللى كتبت دى....الحمد لله ان اللى انا عاقله قدامهم ويعرفونى كويس مش بيشوفوا الحاجات لا دى ولا دى....ما هو اصل الحل الوحيد ساعتها انى مجنووووووووووووووووووونه....
اللى خلانى اكتب الكلام الغريب دا انى حسيت ان اد ايه انا كنت هايفه لما عبرت عن الجنان اللى جوايا بالكلام وبعدين رجعت تانى وقلت .....أمال هاعيش ازاى لو ماتجننتش؟؟؟؟؟؟؟؟؟؟
وبعدين اتجنن هنا بينى وبينكم احسن ما الخلق تتفرج عليا ....واللا ايه؟؟!!!!!!!!؟.........

Wednesday, January 9, 2008

وبعدين يعنى

طب مش عارفه ابعت واقول لحد من اللى اعرفهم انى عندى بتاعه ف الحته دى وقلنا ماشى ....كمان الناس هنا مش شايفانى.....اعمل ايه يعنى انا....؟؟؟؟؟؟؟؟؟؟؟؟.............اقطع نسفى.........ابهدل نسفى

ااااااااااااااااكشن

يرحمكم الله.....

Tuesday, January 8, 2008

بسم الله نبدأ

بداية اشكر كل من سيتطوع....ويضحى بنفسه ويبص على اللى انا كاتباه......دا اذا كتبت حاجه من اصله.............والله هو من ناحيه انا باعرف اكتب باللغه العربيه الفصحى والحمد لله وناس كتير قالتلى اعمل اصدار وانشره........هو من ناحيه....دا طبعا غير الناحيه الاولانيه......انا ضد فكرة النشر......كده وخلاص ومن ناحيه تانيه ودى طبعا تبع اللى غير الناحيه الاولانيه انى حاسه انها عمرها ماهاتوصل للناس بالسرعه ولا بالتأثير اللى نفسى فيه...........لغاية ما فجأه اكتشفت البتاع الرهيب دا......فعلا اختراع..........حاجه هاتفش فيها بإذن الله ويمكن على الله حد يعبرنى واهو يعنى هايبقى من كل ناحيه.........وطبعا زى ماتعودتوا دى غير الناحيه الاولانيه واللى غيرها والتانيه او التالته زى ماتحسبوها............المهم نرجع مرجوعنا للناحيه التانيه بتاعة الناحيه الاولانيه......وحاسب يا معلم لا تتوه منى........والنبى انت شكلك تهت معايا..........نتكلم شويه جد بقى......الناحيه التانيه بجد هى انى احيانا باتجنن وابقى مش انا وباتكسف اورى جنانى دا لحد وبعدين برده البتاع دا اوحالى بفكرة ان ماحدش فيه يعرفنى واهبل فيه بقى زى مانا عايزه.......بس برده.....وشوف يا اخى طمع البنى ادم وعبطه........عايزه كل الناس تشوف هبلى دا وتقراه لأ وكمان يقولولى ايه الجمال دا وايه الحلاوه دى وانتى كنتى فين من زمان واحنا بندخل البتاع دا عشان نقرا البتاعه بتاعتك.....وهيييييييييييييييه......وبصوت عالى بقى مش بتاعة شعبولا لا من بتاعة حكيم......وسقفولوا
ملحوظه "بت اختى محفوظه":..........والنبى
اللى يعرف للبتاع دا اسم غير البوست يقولى.........نسميه مثلا..........البتاعه؟..........اللى عايز يدينى رأيه يكلمنى على زيرو زيرو ويرو تلاتصفار صفرين..........اوعى تنسى وطبعا ماقدرش اكتب الرقم بالحساب لأنه هاتحول.....بتشديد اللام ......من كتر الاصفار.......ياللا بالتوفيق ان شا الله
والنبى ما انا عارفه اذا كان دا الفتحه بتاعة البتاع بتاعى امال بعد كده هايبقى ازااااااااااااااى؟
وطبعا لازم تكون فيه صورة واحد بتلطم
إلى اللكاءى.......يا اصدكاءى